Në përfundim të 36 javëve të kampionatit të Superiores, nuk do të shpallet kampioni i ri dhe kjo tani dihet. Katër të parat e renditura do të marrin pjesë në një Final 4, ku do të përcaktohet ekipi kampion dhe ekipet që marrin pjesë në kualifikueset e UEFA Europa Conference League. E tashmë Departamenti i Garave në FSHF ka publikuar edhe datat e oraret se kur do të zhvillohen ndeshjet
Të gjithë takimet do të zhvillohen në stadiumin “Air Albania”, në periudhën 17-26 maj. Gjysmëfinalja e parë do të zhvillohet më 17 maj, duke nisur nga ora 20:00. Ndërsa gjysmëfinalja tjetër, në po të njëjtën orë, më 19 maj.
Finalja për vendin e tretë/katërt është programuar të luhet më 24 maj, ora 19:00. Ndërsa finalja e madhe për titullin kampion më 26 maj, ora 19:00. Sa i takon shortit të katërshes finale, ai do të zhvillohet në përfundim të sezonit të rregullt të “Abissnet Superiore”.
SI FUNKSIONON “FINAL 4”
Ekipet pjesëmarrëse
4 vendet e para të “Abissnet Superiore” në përfundim të kampionatit të rregullt.
Shorti
Ekipet ndahen në dy vazo, vazo 1 (vendi i parë dhe i dytë), vazo 2 (vendi i tretë dhe i katërt) dhe përmes shortit përcaktohen çiftet gjysmëfinaliste.
Gjysmëfinalet
Kalimi në finale përcaktohet në 90 minuta. Ekipet fituese kalojnë në finalen për titullin kampion. Në rast barazimi në gjysmëfinale, në finale kualifikohet ekipi i renditur në vendin e parë/dytë.
Finalet
Ekipet e kualifikuara nga gjysmefinalet luajnë për titullin kampion, ndërsa ekipet humbëse për vendin e tretë.
ÇFARË PËRFITOJNË KLUBET SPORTIVISHT
Vendi i parë në FINAL 4: Pjesëmarrje në turin e parë kualifikues të Champions League
Vendi i dytë në FINAL 4: Pjesëmarrje në turin e parë kualifikues të Conference League
Vendi i tretë në FINAL 4: Pjesëmarrje në turin e parë kualifikues të Conference League
Vendi i katërt në FINAL 4: Pjesëmarrje në turin e parë kualifikues të Conference League nëse Kupa e Shqipërisë fitohet nga një prej tre ekipeve të para në Final 4