Mbërrin Klasikja, një nga ato ndeshje që zbukurojnë futbollin në Shqipëri. Java e 26 e kampionatit “Abissnet Superiore” do të luhet mes të premten dhe të shtunën. dhe e gjithë vëmendja është në përplasjen mes Vllaznisë e Tiranës. Klasikja do të luhet në Loro Boriçi, ndeshje mbi të cilën është drejtuar edhe interesi i Egnatias, Partizanit e Dinamos. Tre prej sfidave do të zhvillohen më 1 mars, ndërsa dy takimet e tjera të kësaj jave do të luhen më 2 mars.
Laçi – Skënderbeu dhe Egnatia – Dinamo City janë dy ndeshjet hapëse të javës së 26 të kampionatit. Pas fitores ndaj Partizanit në shtëpi, korçarët do të udhëtojnë këtë javë drejt Laçit. Gvozdenovic kërkon të qendrojë në luftë për Final Four, por duhet të mundë një skuadër që në 25 javë kampionat ka 12 barazime. Takimi do të luhet në stadiumin e Laçit duke nisur nga ora 13:30. Në të njëjtën orë, Egnatia do të presë në shtëpi Dinamo City. Kryesuesit pas hapave të fundit të gabuar, kërkojnë të kthehen në shinat e fitores. Tetova e Mehmeti e dinë mirë që nga kjo ndeshje mund të varen shumë gjëra, sidomos për nëndetësen që shpreson të rikthehet në katër më të mirët.
Lexo më tej: Video/ Skënderbeu fiton me një penallti, dy përjashtime e sherr me Partizanin: kthim i hidhur në Korçë për Shehin
Ndeshjet e kësaj dite do të mbyllen me sfidën Partizanit – Kukësi, që do të luhet në stadiumin “Arena e Demave” në ora 17:00. Të kuqtë vijnë nga humbja në Korçë dhe shpresojnë të ndryshojnë rrjedhën e rezultateve. Kukësi është në rënie të lirë, por Devolli nuk ka ndërmend të dorëzohet pa e provuar.
TË DIELËN LUHET KLASIKJA
Ndërkaq, të dielën do të luhen edhe dy sfidat e tjera mjaft emocionuese të javës së 26-të. Klasikja e futbollit shqiptar, Vllaznia – Tirana do të luhet në stadiumin “Loro Boriçi” në ora 17:00. Osmani kërkon të tregojë forcën kundër një favoriti për Final Four. Fagu në anën tjetër është në kërkim të fitores së parë në krye të Tiranës. Po të njëjtën orë do të përballen me njëra-tjetrën edhe Teuta me Erzenin, me sfidën që do të luhet në stadiumin “Niko Dovana”.
